الجمهورية الحمراء

دي مش كناية عن ان الشعب المصري تسعة اعشارة اهلاوية ..
مع ان ده حقيقي .. بس مش ده قصدي .
و مش اقصد كمان ان النظام اتقلب و بقى شيوعي ..
لأن ده محصلش
انا اقصد حاجة تانية خالص ..

حد فكر مرة .. ليه الفراعنة كانوا غاويين يرسموا و ينحتوا على جدران البيوت و المعابد و في الطرق ..
ويعملوا نقوش جميلة في مقابرهم مع انهم حيتدفنوا فيها و في معابدهم اللي حيروحوا يتعبدوا فيها مش حيروحوها فسحه
ليه كانوا غاويين تعب قلب ؟؟
يعني ليه مثلا كان الكاهن برمبتاح (مثلا) كان يحب يكون المعبد شكله جميل من بره ..
هل لأنه عايز الناس تقول بعد 7 الاف سنه ان الراجل ده عمل تحفة فنيه .. ولا لأنه عايز المكان اللي عايش فيه يكون جميل و مخلي شكل المكان حولة جميل ؟؟

طيب لو انتقلنا للمرحلة اللي بعدها في العصر الروماني ..
والعواميد الرائعة اللي كانوا بيزينوا بيها شوارعهم ومليانه رسومات و نقوش جميلة والمعابد الرومانية الجامده جدا ..
تفتكروا ليه حبوا يتفننوا في جمالها كده .. مع ان دي مجرد حاجات حتتحط في الشارع ؟؟
هل (مثلا) اسشوريس مكاريكوس البيزنطي كان عامل عامود سواري علشان الناس كمان 1500 سنه يقولوا الراجل ده كان جامد جدا ..
ولا لأنه كان حابب يكون المكان اللي عايش فيه متزين و شكله جميل ويفتح النفس ؟؟؟

طيب لو انتقلنا للمرحلة التاليه و العصر الاسلامي ..
يتهيالي ان مجرد ذكر كلمة العصر و كلمة الاسلامي .. يبقى احنا قدام كل ما يمكن ان تتخيلة من مباني جميلة وزخارف اسلامية رائعة .. والوان و كل ما يمت للجمال بأي صلة .
طيب هما كانوا بيعملوا كده ليه ؟؟
يعني (مثلا) دار حمزة بن العابد لله الفسطاطي كانت مزينه بالنقوش الاسلامية الرائعة ليه ؟؟ وحيستفيد ايه ؟؟
مجرد انسان بيحب الجمال وعايز يكون عايش في مكان جميل و جماله يزيد من جمال المنطقة حولة ويفتح النفس .

طيب لو انتقلنا للمرحلة التالية ومحمد علي والملكية و الفرنساويين والانجليز ..
والعمارات الجميلة في وسط البلد اللي لو اتشالت من هناك ممكن تخلي الواحد يموت .. العمارات المزركشة برسومات .. الواحد لما يشوفها يستغرب من طول بال صانعها .
هل (مثلا) الخواجة اوناسيس كرياكوس بنى عمارته في وسط البلد علشان الناس كمان 200 سنه يقولوا شفتوا الخواجة عمل ايه ؟؟
ولا علشان الراجل ده عايز شيء متقن و جميل يزيد من جمال المنطقة حواليه و يفتح نفسهم كلهم للحياة و بالتالي الكل يروح شغله مفتون بسحر المكان اللي عايش فيه و يبقى في نهضة كبيرة لأن كله مقبل على شغله ؟؟

وبالانتقال الى عصرنا الحالي ..
العصر الاحمر ..

وده لأن احساسي ان الـ Highlight بتاع مصر بقى اللون الاحمر ..
يعني تحس ان في هالة مشعة باللون الاحمر تحيط بجو البلد ..
ممكن لو واحد واقف على حدود ليبيا او على حدود السودان او حتى فلسطين انه يشوف من بعيييييييييد
نور احمر غريب ..

وده لأن بكل بساطة .. كل مباني مصر الان طوب احمر ..
مش لأنها لسة تحت البناء ..
لأ ..
ده هي كده اخرها ..
طيب الناس عايشة فيها ازاي .. هل لأنها جميلة من جوه .. وطظ في برة ..
طيب هل اللي بيبني ده مش قادر بجملة المصاريف يرش العمارة من بره .. حتى لو بهباب .. بس يديها لون وخلاص ..
ولا مستعجل على المكسب اوي ..
(مثلا) المعلم ثروت الدكش معاه قرشين بيبني بيهم .. علشان يلمهم في حق الشقق

طيب مفيش حاجة تلزمة انه يكمل العمارة للاخر .. بجد حاجة استفزازية جدا ..

طيب تخيل بقى انك عايش في بيت احمر ..
في عمارة حمرا ..
في شارع احمر ..
في حارة حمرا ..
في مدينه حمرا ..
في حي احمر ..
في محافظة تلات ارباعها احمر ..

واللون الاحمر ربنا خلقه مثير للعقل والعاطفة ..
وبالتالي ..
تلاقي الخلق ضيق .. وواقفين على الكلمة .. و العصبية والاستفزاز ..
لأن الحياة في مصباح احمر طبيعي ..
مش مهم الشكل الخارجي .. مش مهم الجمال و الابداع .. مش مهم الواحد نفسه تتفتح ..

مفيش اي اهتمام بالذوق العام والشكل الخارجي .. مفيش اي اهتمام بالشكل اللي يريح العين او يفتح نفس الانسان على الحياة ..
الانسان بطبيعته الجمال يفتح نفسه ويزيده طاقة ..
وطالما مفيش جمال يبقى مفيش طاقة .. يبقى مفيش شغل .. يبقى مفيش ابداع .. يبقى مفيش ذوق .

طالما مفيش ذوق .. يبقى مفيش اهتمام .. يبقى مفيش شغل .. يبقى مفيش طاقة .. يبقى برده مفيش جمال ..

ونفضل في نفس الدايرة دون انقطاع ..
والسبب من رأيي ..

الجمهورية الحمراء

اوووووووووووووووووووووووووووووه

اخيرا مواضيع عمرو عادت من جديد
جميييييييييييل يا عمرو

انا بقى عايزه اقلك ان كان في عماره في شارعنا
برضوا كده سايبنها لونها احمر
لسه فاكرين ييضوها من 5 سنين بس
بس كويس انهم افتكروا عشان في كانوا في وشنا

اللي بيضايقني اكتر
في عمارات تتبيض كويس اوي بس من الواجه وخلاص
وبقيت العماره من الجنب ومن ورا بالطرب الاحمر
والحكايه دي شوفتها كتير مكسلين يكملوا يعني
انا عندي لو سابوا العماره كلها كده افضل

بس ميرسي يا عمرو على موضوعك
و يا ريت مش تنقطع تاني وتستمر

عوده جميله يا عمرو
موضوع حلو فى مصر حصل انحطاط اخلاقى وثقافى وجمالى
مش بس العمارات والشوارع والناس كمان مبقتش تهتم
بالذواق العام
_________________
الفوضى لها نظام

ههههههههههههههههههه
وبعدين بقي
كده مش هينفع خالص (هرد علي الموضوع ستين مره)
هههههههههههههههههه
بس الموضوع حلو وخلاني افكر في حاجات كتير مش كنت واخده بالي منها
ميرسي

_________________
لئن سألتني يارب عن ذنبي يوم القيامه.....لاسألك عن رحمتك
ولئن سألتني يارب عن تقصيري..........لاسألك عن عفوك
ولئن قذفتني في النار لاخبر اهل النار ....اني احبك
فاجعلني عبدا اما طائعا فأكرمته..واما عاصيا فرحمته

حمرة يا قوطة

ههههههههههههههههههههههههههه

والله يا بنى هى فعلا جمهورية حمرة

وكل كلام فعلا صح

ويبقى المنوال على ما هو عليه

لالالالالالالالالالا جديد ولالالالالالالالالالالالالا تغير

هتفضل حمراء

_________________

انا شيفها ان احسن حاجة يعلجوا بيها المشكلة

ينزلوا الطوب الالوان بمبي واخضر واصفر
وكده يبقي في تغير ومفيش داعي ندهن البيوت من برة

ههههههههههههه

والله فكرة جامدة

ايمان حليتهالك
يالا يا عم

بعد 20 سنة عمرو بوكي يكتب

الجمهورية الكاروهات

_________________

ههههههههههههه

والله ممكنه

ههههههههههههههههههههههههههههه

موضوعك حلو اوى ياعمرو

بس بالك بقى ان العمارة الى فى وشك طوبها احمر وم نغير رش

والى جنبك كذالك وكل ما تمشى تلقى كدة كدة الواحد عرف ليه ديما بيكون عصبى

بس بجد اناعاوزة يكون الطوب لونة بمبى او لبنى المهم اى لون هادددى وفاتح

عشان انا بحبهم وغير كدة بيريحوا الاعصاب اوىى

وهتقول كروهااااااااااااااات
برضة

هههههههههههههههههههههههههههه

بصوا بقى انهاردة روحت اشوف الارض بتاعتنا
المهم لقيت حاجات غريبة
الكل بنى ولقيت نفسى وقفة حول طوب احمر كتيرررررر اوى

لدرجة حسيت انى بقيت عصبية جدا

والى كمان نرفزنى اوى لقيت مدرسة معمولة بطوب الاحمر ومش مرشوشة ولا حاجة

والقى بابا بيقولى دى واخدة المدرسة الاولى فى النظافة والشكل قولته ليه على ايه يعنى

دى ولا شكل ولا منظر ومع انها مدرسة خاصة