اهلا بكم في عالمنا الخاص

منتديات شباب نظم
 
دخولس .و .جالتسجيلبحـثالأعضاءالمجموعاتالرئيسية

شاطر | 
 

 ليه كده يا مصر ؟؟

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
honda
مشرف
مشرف
avatar

ذكر
عدد الرسائل : 2224
العمر : 30
Emploi : Basha
تاريخ التسجيل : 28/03/2007

مُساهمةموضوع: ليه كده يا مصر ؟؟   الإثنين 17 مارس - 0:29


طبعا كلنا عارفين ان فى أوروبا والدول المتقدمة الإنسان له مرارة واحدة..انما ف مصر أم الحضارات فنظرا للشلل اللى احنا عايشين فيه.. استطاع العلماء المصريون انهم يزودوا عدد مرارات الإنسان عشان تتناسب مع الخنقة اللى احنا فيها..وهي مصر إيه غير شوية خنقات فوق بعض !!
بس ياجماعة المسألة تجاوزت مرحلة المرارة ودخلت على الشلل الرعاش والبنكرياس والعقد الليمفاوية والسمبثاوية اللى مش عارف إيه هيه




كلنا اتفرجنا على منتخب مصر وكلنا فرحنا
كلنا انبسطنا بالروح العالية للمنتخب والتديّن والترابط
كلنا حبينا أبو تريكة واتعاطفنا مع تعاطفه مع غزة..وكلنا بنفرح لما نشوفه على الشاشة.. وانا بصراحة باحبه ومش عشان موهبته ولا حرفنته لأن فيه لعيبة حلوين كتير سواء هنا أو برة.. أنا باحبه عشان تواضعه وتدينه.. وانا باحب أى حد موهبته بتزيده تواضع وبساطة وقرب من الناس

عارف طبعا ان ده إنجاز وفخر لينا ومش معترض على ده،أنا معترض على حاجة تانية
نائب محترم مقدم طلب للمجلس المحلى عشان الدولة تطلق اسم حسن شحاتة على أحد شوارعها الرئيسية

علامات التعجب اللى فى الكيبورد مش هتكفـّى.. تخيلوا معايا انى باضرب ايدى على صدرى وباشهق الشهقة المعروفة بتاعة الستات دى أيوة

طب ينفع الكلام ده بالله عليكم..يعنى هوّه كل واحد فاز فى كام ماتش نعمل على اسمه شارع.. طب والغلابة اللعيبة دول مش ليهم نفس..يعنى مثلا يبقى فيه كوبرى حسنى عبد ربه..وميدان وائل جمعة..وتمثال إبراهيم سعيد وهوه صابغ شعره أحمر
وللا السواق بقى فى الأتوبيسات..حد نازل سيد معوض يا جدعان .. حد نازل سيد معوض؟؟
والمشاكل اللى تحصل بين الركاب والسواق بقى
انت مش قلت انك هتلف من ميدان عماد متعب؟؟ جبتنا من ميدان عمرو زكى ليه؟؟
يرد السواق: ياجماعة كان لازم عشان المرور أدخل من شارع البطل أحمد فتحى..واركن فى ميدان أحمد حسن..طبعا ماهو وسط الملعب بقى
ونسمّى السد العالى فى أسوان على اسم الحضرى.. يبقى العيال فى المدارس يروحوا الاقصر وأسوان يزوروا معبد الكرنك والسد الحضرى
ومحمد زيدان احتمال يسمّوا الهرم الصغير على إسمه.. يبقى عندنا أهرامات الجيزة.. خوفو وخفرع وزيدان
أما أبو تريكة له نظام مخصوص طبعا.. ده احتمال يسموا مطار القاهرة على إسمه.. يبقى اسمه مطار أبو تريكة الدولى
وتنزل بقى الدعاية فى التليفزيون:عزيزى العميل..إذا حصلت على كأس احصل على شارع أو ميدان مجانا فى شوارع القاهرة..نحن نختلف عن الآخرين..استلم شارعك لحد البيت
ياجماعة احنا عارفين ان البطولة دى حسستنا بالفرحة فى وسط أيامنا دى..بس برضه مش عايزين الفرحة تعمل فينا كده يعنى.. دى اسمها كورة .. أولا وأخيرا لعب يعنى

داحنا معرفناش أحمد زويل إلا لما أخد نوبل.. ولما جينا نكرّمه عملنا على إسمه كوبرى ثروت عند جامعة القاهرة.. وبقت اليافطة مكتوبة.. كوبرى أحمد زويل..ثروت سابقا..انت متصوّر ان حاجة اتغيرت؟؟ أبدا.. لسة الناس كلها بيقولوا عليه كوبرى ثروت والسواقين بيقولوا عليه كوبرى ثروت.. عشان بس لما أحمد زويل يزعل وللا حاجة.. نقول له عملنا باسمك كوبرى والناس اللى مش طايقاك يا أخى

مش مكسوفين لما تبقى كل سمعتنا برة مصر اننا بلد عمرو دياب وتامر حسنى وعادل إمام ودينا وفيفى عبده وكأس أفريقيا..وميعرفوش ان البلد دى خرجت أعظم علماء ومفكرين ومبتكرين وسياسيين على مدى التاريخ

طيب حاجة تانية.. اتفقنا انى باحب ابوتريكة جدا كشخصية برّة اللعب كمان وبابقى مبسوط لما اشوف ابتسامته الصافية وإيمانه.. تمام كده؟؟ تمام.. طب ينفع مع كل ده ان خطيب مسجد فى محافظة قنا يعمل خطبة الجمعة عن أبوتريكة تحديدا..ويقول عليه أمير قلوب الشباب.. وطول الخطبة وصف فى أبو تريكة؟؟

ربنا شرع خطبة الجمعة دى كموعظة أسبوعية لتذكير الناس بأمور دينهم وما يستجد عليهم..أقوم أنا أعمل خطبة كاملة عشان لاعب كورة مهما كان محبوب..أنا مش باتكلم عن الشخص أنا باتكلم عن المبدأ

طب والفلوس دى اللى نازلة كجلمود صخر حطه السيل من علِ على اللعيبة..كل لعيب مليون من هنا ومليون من هناك..طب احنا كنا معاكم بنشجعكم وانتوا عريانين فى الملعب قاعدين تسفـّوا التراب عشان تجيبوا جون..إنما نشجعكم ازاى دلوقتى وكل واحد فيكم طالع نازل بملايين من كل دولة..طب الموظف الغلبان اللى مش عارف يجيب إزازة زيت عشان بقت بتمانية جنيه ومش من النضيف يعنى..يعمل ايه وهوه شايف شاب من دور ولاده فى أسبوعين أخد كام مليون..أظن ده هيروح لابنه وهوه بيذاكر يقول له: مذاكرة إيه ياابن الكلب.. قوم فزّانزل روح العب فى الشارع جايز ربنا يكرمك وتدخل المنتخب

طب يعنى ما تخللوا المكافآت دى بينكم وبين بعض

يعنى الأمير سرحان بن فهمان بن عجلان آل وهبان عايز يرش رشة على المنتخب ياخدهم فى قصره من سكات ويخليهم يفتحوا ايديهم كده ورا بعض وهوه يمر عليهم باللى فيه النصيب..ولا من شاف ولا من درى
ورجل الأعمال سعود بن فهود بن أكسيد اليود آل عبود عايز يظبط اللعيبة..يزور كل واحد منهم فى بيته ويرش عيدية على العيال ولادهم وخلاص.. بدل ما كل شوية نتحسر على الأرقام اللى الناس دى بتاخدها يعنى.. احنا بشر يعنى ياجدعان وجتـّتنا مش جِبْس والله
واللى يزيد الطين بلـّة بقى.. كلام المسئولين بعد الفوز..كل واحد طالع يقول.. وطبعا أول اللى تعبوا معانا طول البطولة وصاحب الفضل الأول فيها هو سيادة الرئيس .. صلاة النبى
يعنى اللعيبة سافرت واتمرمطت والجهاز الفنى جاله الضغط والسكر والشعب كله جاله البواسير من القعدة قدام الماتشات.. والفضل طلع للسيد الرئيس
أنا أظن ان بيبقى فيه برقيتين جاهزين عند السيد الرئيس عشان الماتش النهائى.. لو المنتخب فاز تبقى البرقية "تابعنا بكل شغف آداءكم الراقى وفوزكم بالبطولة" ولو خسروا هتبقى البرقية" لم نتابع شيئا..روحوا الله يحرقكم"

زى مرة فى رمضان زمان كنت باتفرج على مباراة خماسى فى التليفزيون بين فريق علاء مبارك وفريق تانى.. والراجل اللى بيذيع ياعينى مش عارف يقول ايه.. يعنى مثلا الكرة اتقطعت من علاء مبارك.. مش معقولة يقول الكورة اتقطعت.. دا يتحبس فيها.. هيه الدنيا سايبة.. فيقعد يلف ويدور بقى: وزى ما انتوا شايفين.. الكورة فى رجل السيد علاء مبارك.. ولسة ف رجل السيد علاء مبارك بكل مهارة.. وأخدها الفريق التانى بمحض الصدفة مش عارف ازاى بمحض الصدفة صراحة..وطبعا زى ما انتوا شايفين ان السيد علاء مبارك مالوش أى ذنب فى إن الكورة اتقطعت.. انتوا فاهمين؟؟ مالوش أى ذنب.. أظن كلامى واضح!!!

وآه بقى لو فريق علاء مبارك جاب جون..حتى لو كان علاء مبارك واقف دفاع ومالمسش الكورة أصلا ،المذيع يصرخ ويقول: ياجماعة الخبرة خبرة..السيد علاء مبارك هوّه اللى مرَّر الكورة من الأول لزميله من ربع ساعة وهوَّه اللى فكَّر فى خياله ان الكورة احتمال تيجى جون..وبما إن الأعمال بالنيات .. يبقى برافو..السيد علاء مبارك..أحرز الهدف الأول!!

منقــــــــــــول
انا عجبني اوي الاسلوب
رغم انى طبعا معترض على شويه حاجات
قولولى رأيكم مع ولا ضد المقال؟؟
الرجوع الى أعلى الصفحة اذهب الى الأسفل
no one
مشرف
مشرف
avatar

ذكر
عدد الرسائل : 2741
العمر : 30
Localisation : west el balad
تاريخ التسجيل : 15/04/2007

مُساهمةموضوع: رد: ليه كده يا مصر ؟؟   الإثنين 17 مارس - 2:51


اولا قصة الشوارع دي

عندنا شوارع في مصر كتير ليها اسماء غريبة

مش عارف شارع البطل مش عارف مين و انت اصلا مش عارف هو بطل في ايه

عمرو شخصيا لأن شارعهم لسه متسماش قرر ينزل يحط يافطة علي اول و اخر الشارع مكتوب عليهم شارع البطل عمرو عبدالله يعني جت علي حسن شحاتة

بدل ما اسماء الشوارع في المعادي بالارقام نسميها باسماء الجهاز و اللعيبة بسيطة


خطبة ابو تريكة دي بقي مهزلة بجميع المقاييس
بيفكرني بامام جامع في صفط اللبن كان عندي شغل هناك و صليت هناك
الناس اصلا مش لاقيه تاكل ودا بيحسهم انهم يتبرعوا بفلوس للفلسطنيين قالوهم اعتبر ان زاد عندك عيل زيادة و اديله مصروفه زي ما بتدي عيالك و لم الفلوس وروح اتبرع بيها اخر الشهر
وكل الي اعدين غالبا مش بيدوا مصروف لولادهم هما دا بالعافية بيأكلوهم دا لو اكلوهوم اصلا

خطب الجمعة بقت مهازل بمعني الكلمة ودا طبعا لغياب الرقابة

السيد علاء مبارك
اسكت يا لساني ........اسكت يا لساني
راجل زي الفل طبعا
الرجوع الى أعلى الصفحة اذهب الى الأسفل
SUBziROOO
مشرف
مشرف
avatar

ذكر
عدد الرسائل : 636
العمر : 31
Localisation : giza
تاريخ التسجيل : 01/04/2007

مُساهمةموضوع: رد: ليه كده يا مصر ؟؟   الإثنين 17 مارس - 20:02

لا بجد كلام من واحد من مصري
عاش فيها وحاسس بيها

مقالة حلوة
شكرا ياهوندا....
الرجوع الى أعلى الصفحة اذهب الى الأسفل
amrbooki
مشرف
مشرف
avatar

ذكر
عدد الرسائل : 2513
العمر : 30
Emploi : helwan univ ( accounting
تاريخ التسجيل : 28/03/2007

مُساهمةموضوع: رد: ليه كده يا مصر ؟؟   الثلاثاء 18 مارس - 16:05

سبحان الله .. انا كنت لسة بتكلم في حكاية الشوارع دي .. وكنت قررت اسمي شارعنا بأسمي ..

ومحدش عارف حاجة .. وكل اللي حغرمة .. يافطة صفيح ..

والله الموضوع طلع في دماغي ..
..

اما بخصوص الموضوع .. فالمعروف ان احنا ناس عاطقيين جدا.. وده السبب الرئيسي في تحركاتنا و اعمالنا ..
وكل ردود افعالنا .
ولان العلماء والمفكرين .. الكبار جدا .. تأثيرهم علينا مش مباشر .
فمش بنعرف نحس بشغلهم ..
وبالتالي .. بنميل اكتر ناحية الحاجات اللي بيكون تأثيرها علينا مباشر ..
وغالبا بتكون حاجات تافهه ..

بس على العموم .. انا شايف ان اللي كاتب بالغ شوية ..
الرجوع الى أعلى الصفحة اذهب الى الأسفل
emy
مراقب
مراقب
avatar

انثى
عدد الرسائل : 1818
تاريخ التسجيل : 04/08/2007

مُساهمةموضوع: رد: ليه كده يا مصر ؟؟   الجمعة 21 مارس - 21:27

طيب هو لما يكتبوا الاسماء علي الشوارع هيلموا يرادات الشوارع دي لحسابهم ولا ايه؟؟؟؟
شكرا يا مهند
الرجوع الى أعلى الصفحة اذهب الى الأسفل
a.kamal
مراقب
مراقب
avatar

ذكر
عدد الرسائل : 400
العمر : 29
Localisation : Nasr City
تاريخ التسجيل : 21/03/2008

مُساهمةموضوع: رد: ليه كده يا مصر ؟؟   الأحد 23 مارس - 21:44

شكراَ يا مهند
بجد الموضوع جامد
يعنى بخصوص اسماء الشوارع وكل من هب ودب نعمله شارع باسمه طبعاَ ده كلام فارغ.
ولا كمان خطبة الجمعة اللى عن أبو تريكة صحيح هو محترم بس يعنى مش صحابى جليل عشان الخطبة كلها تبقى عنه.
الرجوع الى أعلى الصفحة اذهب الى الأسفل
honda
مشرف
مشرف
avatar

ذكر
عدد الرسائل : 2224
العمر : 30
Emploi : Basha
تاريخ التسجيل : 28/03/2007

مُساهمةموضوع: رد: ليه كده يا مصر ؟؟   الأحد 23 مارس - 23:29

شكرا يا شباب على ردودكم
واهلا يا a.kamal بيك معانا في المنتدى
الرجوع الى أعلى الصفحة اذهب الى الأسفل
GLADIATOR
مراقب
مراقب
avatar

ذكر
عدد الرسائل : 633
العمر : 28
Localisation : EL MAADI .CAIRO
Emploi : FACULTY OF COMMERCE AND BUSINESS ADMINISTRATION
تاريخ التسجيل : 04/11/2007

مُساهمةموضوع: رد: ليه كده يا مصر ؟؟   الإثنين 24 مارس - 6:04

والله موضوع جامد يا راجل ده فى القاهره الكبرى بس 4 شوارع اسمها عبد المنعم رياض فى المعادى و امبابه والتحرير و المهندسين بقى ده يرضى ربنا
الرجوع الى أعلى الصفحة اذهب الى الأسفل
 
ليه كده يا مصر ؟؟
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
اهلا بكم في عالمنا الخاص :: كلام من القلب :: فضفضة-
انتقل الى: